06/07/2026
اوورسیز ایمپلائمنٹ پروموٹرز کے لیے اہم ہدایات
ڈائریکٹر جنرل، بیورو آف ایمیگریشن اینڈ اوورسیز ایمپلائمنٹ (BEOE) نے اوورسیز ایمپلائمنٹ پروموٹرز کی جانب سے ایمیگریشن آرڈیننس اور ایمیگریشن رولز 1979، نیز لائسنس کی شرائط کی خلاف ورزیوں پر شدید تشویش کا اظہار کیا ہے۔ بیرونِ ملک ملازمتوں کے اشتہارات یا تشہیر پرنٹ میڈیا، الیکٹرانک میڈیا یا سوشل میڈیا پر شائع کرنے سے پہلے متعلقہ پروٹیکٹر آف ایمیگرنٹس (Protector of Emigrants) سے پیشگی منظوری حاصل کرنا قانونی طور پر لازمی ہے۔ غیر منظور شدہ اشتہارات نہ صرف قانون کی خلاف ورزی ہیں بلکہ بیرونِ ملک ملازمت کے خواہش مند افراد کو جعلی نوکریوں، مالی فراڈ اور غیر قانونی بھرتی کے خطرات سے بھی دوچار کر سکتے ہیں۔ اسی لیے آئندہ کسی بھی خلاف ورزی کی صورت میں متعلقہ اوورسیز ایمپلائمنٹ پروموٹر کے خلاف سخت قانونی اور انتظامی کارروائی کی جائے گی، جس میں لائسنس کی معطلی، منسوخی اور معاملہ مزید قانونی کارروائی کے لیے فیڈرل انویسٹی گیشن ایجنسی (FIA) کو بھیجنا بھی شامل ہو سکتا ہے۔
اوورسیز ایمپلائمنٹ پروموٹر کے رجسٹرڈ ملازمین کو کسی دوسرے کاروبار، مثلاً ٹریول ایجنسی، حج و عمرہ سروس، یا ٹریڈ ٹیسٹنگ سینٹر میں تعینات نہیں کیا جا سکتا۔ اسی طرح یہ ملازمین کسی بھی صورت میں سب ایجنٹ (Sub-Agent) یاIntermediaryکے طور پر کام نہیں کر سکتے۔ بیرونِ ملک افرادی قوت کی بھرتی، امیدواروں کی جانچ (Screening)، انٹرویو، انتخاب اور تمام امیگریشن پراسیسنگ کی مکمل ذمہ داری صرف لائسنس یافتہ اوورسیز ایمپلائمنٹ پروموٹر کی ہے۔ یہ ذمہ داری کسی ٹریڈ ٹیسٹنگ سینٹر یا کسی دوسرے ادارے کو منتقل نہیں کی جا سکتی۔ اگر کوئی اوورسیز ایمپلائمنٹ پروموٹر دیگر تجارتی سرگرمیاں بھی انجام دیتا ہے تو انہیں الگ دفتر، الگ عملے اور الگ انتظام کے تحت چلانا ضروری ہے تاکہ قانونی تقاضوں کی مکمل پابندی یقینی بنائی جا سکے۔ بیورو آف ایمیگریشن اینڈ اوورسیز ایمپلائمنٹ نے تمام پروٹیکٹرز آف ایمیگرنٹس کو ہدایت جاری کی ہے کہ وہ باقاعدگی سے دفاتر کا معائنہ کریں، قوانین پر عمل درآمد کو یقینی بنائیں، اور مسلسل خلاف ورزی کرنے والوں کے خلاف قانون کے مطابق سخت کارروائی کریں۔
