14/03/2026
အင်္ဂလိပ်လို Trust ၊ ဂျပန်လို 信用(しんよう) ၊ မြန်မာလို ကတိသစ္စာဟူသည် ...
“ကတိသစ္စာ တည်သောခါဝယ် နွယ်မြက်သစ်ပင် ဆေးဖက်ဝင်၏”
မြန်မာစာပေမှာအထင်အရှား ဆိုရိုးရှိနေဆဲဖြစ်သည်။ လူအများစုသည် မိမိတို့ဆန္ဒအတွက်အချိန်မရွေး ကတိများပေးတတ်ကြသည်။ သို့သော် ပေးခဲ့သည့် ကတိများတည်စေရန် မည်သို့မည်ပုံ ထိန်းသိမ်းရမည်ကိုကား မသိကြ။
အဘိဓာန်အဓိပ္ပာယ်ဖွင့်ဆိုချက်အရ ကတိဟူသည် တစ်စုံတစ်ဦးအနေဖြင့် သတ်မှတ်ထားသည့် တစ်စုံတစ်ရာကို ပြုလုပ်ပါမည် သို့မဟုတ် ရှောင်ကြဉ်ပါမည်ဟူသော ကြေညာချက်ဖြစ်သည်။ လူတစ်ဦးကို သတ်မှတ်ထားသော လုပ်ရပ်တစ်ခုအား ပြုလုပ်ခြင်းကို မျှော်လင့်ရန် သို့မဟုတ် အာမခံချက်ပေးရန် အခွင့်အရေးပေးမည်ဟူသည့် စည်းမျဉ်းသဘော ကြေညာချက် ဖြစ်သည်။
လူတစ်ဦးက အခြားသူတစ်ဦးအပေါ် ကတိမတည်သည့်အခါ ထိုသူသည် အဆိုပါအခြားသူကို တန်ဖိုးမထားဟူသည့် ဆက်ဆံရေးသဘောကို ဆောင်သည်။
မိမိ ကတိပေးထားသည့် အရာအစား အခြားတစ်ခုကို ရွေးချယ်လိုက်ခြင်းသည် မိမိသည် အားကိုးအားထားပြုရန် မသင့်ကြောင်း၊ ယုံကြည်လို့မရကြောင်း ဖော်ပြသကဲ့သို့ဖြစ်သည်။
ဆက်ဆံရေး၌ သေးငယ်သော အက်ကြောင်းကလေးများ ဖြစ်ပေါ်လာခြင်းသည်ပင်လျှင် ကတိချိုးဖောက်မှု၏ အမှတ်အသားဖြစ်သည်။ ကတိချိုးဖောက်ခြင်းသည် အခြားသူများနှင့် ဆက်ဆံရေးကို တန်ဖိုးမထားရုံသာမက မိမိကိုယ်တိုင်၏ စကားကိုပင် မိမိအနေဖြင့် တန်ဖိုးမထားခြင်းဖြစ်သည်။ တစ်နည်းအားဖြင့်ဆိုသော် မိမိကိုယ်တိုင်ကိုပင် တန်ဖိုးမထားခြင်းဖြစ်သည်။ မိမိကိုယ်တိုင်ကို တန်ဖိုးမထားသူအား အခြားသူများကတန်ဖိုးထားသင့် ယုံကြည်သင့်ပါမည်လား။ ထို့ကြောင့် ကတိများ ချိုးဖောက်ခြင်းသည် မိမိကိုယ်တိုင်၏ ပုံရိပ်၊ မိမိကိုယ်မိမိ ယုံကြည်မှုနှင့် မိမိ၏ ဘဝတစ်ခုလုံးကို ထိခိုက်စေနိုင်သည်။
အချို့သောသူတို့သည် တစ်စုံတစ်ဦးက မိမိအား နှစ်သက်စေရေး သေချာစေရန်အတွက်လည်းကောင်း၊ မိမိလိုလားသောအရာ ရရှိစေရန်အတွက်လည်းကောင်း တကိုယ်ကောင်းဆန်စွာကတိတစ်လုံးကို လွယ်လွယ်ပေးလိုက်တတ်ကြသည်။ အခြားသူများ ကြားချင်သည့်စကားကို ပြောလိုက်ခြင်း ဖြစ်သည့်အတွက် ထိုသူများ ပျော်ရွှင်သွားကြသည်။ သို့သော် မိမိအနေဖြင့် ကတိပေးလိုက်သော အရာနှင့် ပတ်သက်၍ မိမိကိုယ်မိမိ ရိုးသားကြောင်း လိပ်ပြာသန့်ရန်လိုပေသည်။
ဘဝသည် အလင်း၏သွားနှုန်းဖြင့် လျင်မြန်စွာ ကုန်ဆုံးသွားနေပြီး လူသားတို့အနေဖြင့် မိမိ၏ အချိန်များကို မည်သို့မည်ပုံ ကုန်ဆုံးစေမည်နည်းဟု ရွေးချယ်မှုများ ပြုလုပ်နေရတတ်သည်။ ထို့ကြောင့်ဘဝ၏ အစီအစဉ်များကို စဉ်းစားသတ်မှတ်ထားရန် လိုအပ်သကဲ့သို့ပင် ကတိမပေးမီ မိမိတည်နိုင်မည့်ကတိ ဟုတ်မဟုတ် မိမိကိုယ်မိမိ အသေအချာ မေးရန် လိုအပ်သည်။
မည်သို့ပင်ဖြစ်စေ ပေးပြီးသားကတိများကို တည်အောင်ထိန်းသိမ်းခြင်းသည် အခြားသူများအတွက် ကောင်းကျိုးပြုခြင်းသာမက မိမိကိုယ်တိုင်အတွက်ပါ ကောင်းကျိုးပြုခြင်းဖြစ်ပါကြောင်း…
ကျွန်တော်အရမ်းကြိုက်သည့် ဂျပန်စကားစုလေးရှိပါသည်။
“信用は無形の財産 (しんようはむけいのざいさん)”
目には見えないが、信用こそが金銭以上の価値を持つ財産であるということ
မျက်စိဖြင့်မမြင်နိုင်သော်လဲ ယုံကြည်မှုကသာလျှင်ငွေကြေးထက်ပိုတန်ဖိုးရှိတဲ့ပိုင်ဆိုင်မှုဖြစ်တယ် လို့ဆိုလိုပါတယ်
SMOOTH LIFE မိသားစု
