28/11/2023
شنو هي l'absence maladie ؟
غادي نبداو من مدونة الشغل لي كاتكول فالمادة 271 بلي :
أي أجير ماقدش ايمشي للخدمة ديالو سواءً بسبب مرض أو حادثة، خاصو ضروري إبرر الغياب ديالو ويعلم المشغل ديالو فأجل مكايتعداش 48 ساعة ، هذا من جهة ، من جهة أخرى نفس المادة كاتكول بلي إلا كان الغياب غادي إيفوت 4 أيام فراه خاص الأجير اعلم المشغل ديالو بالمدة المحتملة ديال الغياب ديالو ويرسل ليه شهادة طبية كمبرر لهاد المدة ديال الغياب
إذن ملي تحس براسك عيان وماقادش تمشي للخدمة، أول حاجة غادي ديرها باش تحمي راسك هي تصايب certificat médical وتعطيه لشي واحد قريب ليك ايوصلو للشركة فاش خدام ويطلب accusé de réception كإثبات بلي الشركة توصلات بديك الشهادة وهادشي خاصك ديرو داخل أجل 48 ساعة
حاجة مهمة خاصك ترد ليها البال، هو أن المادة 271 من مدونة الشغل كاتعطي للمشغل الحق أنه إيتأكد من أنك فعلاً مريض عبر واحد المسطرة لي سميتها la Contre visite بمعنى أن المشغل من حقو أنه ايرسل ليك طبيب من إختيارو وعلى النفقة ديالو فمدة الغياب لي محددة فالشهادة الطبية لي رسلتي ليه ، هاد الطبيب غادي ادير عليك الكشف ويصايب واحد التقرير كيأكد أو كينفي فيه أنك فعلا مريض
نقطة أخيرة عنداك تمشي ترفض المسطرة ديال la contre visite حيتاش الرفض ديالك غادي إدخل فخانة الأخطاء الجسيمة أو les fautes graves فمدونة الشغل ولي كتشكل مبرر قوي باش ايتم الفصل ديالك من العمل ديالك وهادشي وقع فأحكام صادرة عن محكمة النقض فجوج ديال القضايا وحدة ف 2013 ووحدة ف 2019 بحيث أن المحكمة إعتابرات عدم الإمتثال لمسطرة la contre visite ،علما أن الأجير تعلم بلي غادي إدوز عندو الطبيب، إعتابرات المحكمة هاد التصرف خطأ جسيم كايأدي للفصل من العمل.
إذن عرف حقوقك وحضي راسك ... تهلاو
#منقول
