25/07/2024
ဂျပန်ယာဉ်မောင်းလိုင်စင်ဟာ ဂျပန်နိုင်ငံတွင်းနေထိုင်သူမည်သူမဆိုလက်ဝယ်ကိုင်ဆောင်ထားသင့်ပါတယ် သတိထားဖို့ကတော့ကောင်းကျိုးရှိသလိုဆိုးကျိုးလည်းရှိတာမမေ့သင့်ပါ။
ကောင်းကျိုးကတော့
ခေတ်လူငယ်အများစုဟာ မြန်မာနိုင်ငံမှာ ကိုယ်ပိုင်လစာဝင်ငွေနဲ့ ကိုယ်ပိုင်ကားတစ်စီးပိုင်ဆိုင်ဖို့အတွက်မလွယ်ကူပေမဲ့ ဂျပန်မှာတော့ ရရှိကြတဲ့လစာဝင်ငွေနဲ့ တစ်ပတ်ရစ်ကားဟောင်းများကိုချိုသာတဲ့ဈေးနှုန်းနဲ့ဝယ်ယူနိုင်မှာပါ။ (သို့သော် ၁၀ နှစ်အထက်ကားဟောင်းများပေးဆောင်ရမဲ့အခွန်ငွေမြှင့်တင်လိုက်သည်ကိုသတိမူပါ)
မိမိတို့ရဲ့ သူငယ်ချင်း မိသားစုဝင်များ နှင့်အတူလည်ပတ်သွားလာသည့်အခါဖြစ်စေ၊ ဇနီး ခင်ပွန်းနှင့်အတူ ဈေးဝယ်ထွက်သည့်အခါဖြစ်စေ၊ ဘူတာအကြိုအပို့ အလို့ငှာအဆင်ပြေမှုရရှိစေမှာပါ။
ယာဉ်မောင်းလိုင်စင်ကိုင်ဆောင်ထားသူများဟာ လုပ်ငန်းသစ်ရယူဖို့ အတွက်မှာလည်း ပိုမိုလွယ်ကူမှုရရှိစေမှာဖြစ်ပါတယ်။
ဘိုးဘွားရိပ်သာလုပ်ငန်း၊ ဆောက်လုပ်ရေးလုပ်ငန်းများသာမက ရုံးလုပ်ငန်းဆိုင်ရာ ကုမ္ပဏီများဟာ ယာဉ်မောင်းလိုင်စင်ကိုင်ဆောင်ထားသူများအတွက် လစဉ် အထူးခံစားခွင့် ငွေကြေး ပေးဆောင်ပါလိမ့်မယ် (ကုမ္ပဏီတိုင်းမဟုတ်ပေမဲ့ အများစုကတော့ ပေးဆောင်ကြပါတယ် မော်တော်ယာဉ်မောင်းစရာမလိုအပ်ပါ)
ကိုယ်ပိုင်ကားရှိခြင်းဖြင့် အရေးပေါ်အခြေအနေမှာအထူးအသုံးဝင်ပါလိမ့်မယ် ဥပမာပေးရရင် ဆောင်းတွင်းကာလ ကိုဘေမြို့တော်ငလျင်ကြီးလှုပ်ခတ်ခဲ့စဉ်အခါမှာ ရက်ရှည်လများ လျှပ်စစ်မီးပြတ်တောက်ခဲ့ပါတယ်။ အရေးပေါ်ကယ်ဆယ်မှုလည်း နောက်နှေးခဲ့ပါတယ် ၎င်းအချိန်ပိုင်းကာလ မိမိတို့ရဲ့ကားတွေပေါ်မှာ ထောင်သောင်းမကသော မိသားစုဝင်များ အသက်ဆက်ခဲ့ရတဲ့ သာဓကရှိခဲ့ဘူးပါတယ်။
သက်ရွယ်ကြီးလာတဲ့အခါမှာ သက်သောင့်သက်သာလုပ်ငန်းများလုပ်ကိုင်မှုဖြင့် ဝင်ငွေရရှိစေမှာဖြစ်ပါတယ် (ယာဉ်မောင်းကျွမ်းကျင်မှုတော့လိုအပ်ပါလိမ့်မယ်) မမေ့ဖို့ကတော့ အများစုလက်ဝယ်ကိုင်ဆောင်ထားကျတဲ့ အသေးစားယာဉ်မောင်းလိုင်စင်မှနေတစ်ဆင့် ကားလတ်၊ ကားကြီးများအထိမောင်းနှင်လို့ရမဲ့ ယာဉ်မောင်းလိုင်စင်ကို သက်ရွယ်ငယ်စဉ် တစ်ဆင့်ပြီး တစ်ဆင့် ဖြေဆိုရယူထားကြပါ။ (သက် ၅၀ ကျော်မှရယူဖို့ကြိုးစားဖြေဆိုပါက ခက်ခဲမှုများစွာရင်ဆိုင်ကြရမှာပါ)
သတိပြုရန်
ကားစဝယ်တာနဲ့ ယာဉ်ရပ်နားဖို့နေရာမဖြစ်မနေရှိနေရပါ့မယ်။
ဝယ်ယူကြမဲ့ မော်တော်ယာဉ်အပေါ်မူတည်ပြီး ၁ နှစ် (သို့) ၂ နှစ် ယာဉ်မောင်းခွင့်လိုင်စင် ရယူရပါလိမ့်မယ်။ မော်တော်ယာဉ်လိုင်စင်ရုံးသို့မိမိတို့ဘာသာလုပ်ဆောင်ပါက သက်သာမှုရရှိစေမှာပါ ( မခက်ခဲပါ) အချိန်မပေးနိုင်ပါလျှင် လုပ်ဆောင်ပေးကြတဲ့ပွဲစား များလည်းရှိပါတယ် (လုပ်ဆောင်ခ ၅ ထောင် ၁ သောင်းခန့်လောက်သာပေးဆောင်ရမှာပါ)
ဆိုးကျိုး
လက်ဝယ်ပိုင်ဆောင်ထားကြတဲ့ မော်တော်ယာဉ်အပေါ်မူတည်ပြီး ၁ နှစ်တစ်ခါ (သို့) ၂ နှစ်တစ်ခါ ကားလိုင်စင်ဝင်ပါက နိုင်ငံတော်အစိုးရမှသတ်မှတ်ထားတဲ့အာမခံကို မဖြစ်မနေထားရှိရမှာပါ (မတော်တဆယာဉ်တိုက်မှု ဖြစ်ပွားပါက ၂ ဦး၂ ဘက် ထိခိုက်နစ်နာကြေးနှင့် မော်တော်ယာဉ်ပြင်ဆင်စရိတ် မပါရှိပါ) ထို့အတွက်ကြောင့် အခြေခံအနေနဲ့ တစ်ဖက်သားယာဉ်အားပြင်ဆင်ဖို့ပေးဆောင်ရမဲ့ စရိတ်စကအတွက် ထပ်မံပြီးအာမခံထားရှိသင့်ပါတယ်။ (မထားမနေမရမဟုတ်ပေမဲ့ ထားရှိပါက တစ်ဖက်သားအားကြီးမားတဲ့ထိခိုက်ဒဏ်ရာဖြစ်ပေါ်လာသည့်အခါ အဆိုပါ အာမခံမှ တာဝန်ယူပေးဆောင်ဖြေရှင်းပေးပါလိမ့်မယ် သို့မဟုတ်ပါက ကုန်ကျမည့်စရိတ်စကအလုံးစုံမိမိဖာသာဖြေရှင်းရမှာပါ) ၂ ဦး ၂ ဘက်ထိခိုက်နစ်နာမှုအတွက်တာဝန်ယူဖြေရှင်းလိုသည့် အာမခံလည်းထားရှိလို့ရပါတယ် ကျသင့်ငွေ ခန့်မှန်းခြေ ပုံမှန်အာမခံကြေးထက် ၂ ဆ ခန့်ပေးဆောင်ရပါလိမ့် မယ်။ မော်တော်ယာဉ်ဈေးကြီးပေးဝယ်ထားယူသူများအနေနဲ့ မဖြစ်မနေထားရှိသင့်ပါတယ်။
မော်တော်ယာဉ်အခွန်ကတော့ မိမိတို့ပိုင်ဆိုင် ထားကျတဲ့ မော်တော်ယာဉ်အပေါ်မူတည်ပြီး နှစ်စဉ် မေလ ၃၁ ရက် နောက်ဆုံးနေ့ သတ်မှတ်လို့ ပေးဆောင်ကျရမှာပါ။ ၎င်းရက်ကျော်လွန်ပါက နောက်ကျကြေးပေးဆောင်ရမှာသတိပြုပါ။ (မပေးဆောင်ပါက ဂျပန်နိုင်ငံသားအပါအဝင် မည်သည့်နိုင်ငံသားမဆို တရားရုံးမှဆင့်ခေါ်တဲ့ စာရောက်လာပါလိမ့်မယ်။ နိုင်ငံခြားသားများအနေနဲ့ မိမိတို့ ရရှိထားကျတဲ့ နေထိုင်ခွင့်ပိတ်သိမ်းခံရမည်သာမက ဒဏ်ကြေး၊ ထောင်ဒဏ်အထိ သတ်မှတ်ကျခံရမှာပါ)
အထူးမမေ့ဖို့ကတော့ မော်တော်ယာဉ်သည် လူသတ်လက်နက်တစ်ခုပါ ယာဉ်မောင်းလိုင်စင်လက်ဝယ်ကိုင်ဆောင်ထားကြပေမဲ့ ယာဉ်မောင်းကျွမ်းကျင်မှုမရှိသူအများအပြားပါ (Paper Driver ကားလိုင်စင်စာရွက်သာကိုင်ဆောင်ထားသူယာဉ်မောင်းသမား) အရဲစွန့်ပြီးမမောင်းကြပါနဲ့ ကားလိုင်စင်လက်ဝယ်ရရှိပေမဲ့ ကျွမ်းကျင်မှုရရှိစေဖို့ တတ်ကျွမ်းသူများနှင့်အတူ လေ့ကျင့်သင်ကြားစေလိုပါတယ်။
တတ်ကျွမ်းသူများလည်း မော်တော်ယာဉ်သည် လူသတ်လက်နက်တစ်ခုဖြစ်သည်ကို အမြဲတစေအမှတ်ရပါ။
ကြောက်စရာအကောင်းဆုံး
နောက်ဆုံးအချက်ကတော့ မူးရင်မမောင်းနဲ့မောင်းရင် ဒဏ်ငွေ သောင်း ၃၀ မှ သောင်း ၂၅၀ အပြင် ထောင်ဒဏ် ၃ နှစ်ကျခံရမည်ဖြစ်ပါတယ်။ အရက်သေစာသောက်စားပြီး အသက်သေဆုံးမှု ဖြစ်ပွားပါက ထောင်ဒဏ် ၇ နှစ် နှင့် သေဆုံးသူရဲ့ အသက်အရွယ်၊ ပညာ၊ ရာထူး၊ ဝင်ငွေအပေါ်မူတည်လို့ ဒဏ်ငွေပေးဆောင်ရမှာပါ။ အဆိုပါ ယာဉ်တိုက်မှုဖြစ်ပေါ်ပါက မိမိတို့ထားရှိသည့် မည်သည့်အာမခံမဆို တာဝန်ယူဖြေရှင်းမည်မဟုတ်ပါ
စာရေးသူကိုယ်တိုင်လည်း နေ့စဉ်ကီလို ၁၀၀ ခန့်မောင်းနှင်သူမို့လို့ ပိုမိုသတိမူရမှာပါ။
#免許 #車免許 #日本
#運転 #旅行 #バイク #車好き
#私の生き甲斐
