04/02/2022
السلام عليكم الناس ديالنا، اليوم عندي لكم خبر زوين بغيت نشاركو معكم كيف العادة.
أحسن حاجة ممكن تسمعها من خوك لي في الدومين – هو أنه خَرّج فكرة من راسو وحَطّها في أرض الواقع. احنا ثلاثة ديال الناس (والأسبوع جاي غادي نكونو رسميا 5) أسسنا بلاتفورم موجه للمبرمجين: moredev.co شي حاجة لي ما جاتش بالصدفة.
السيرفس لي ممكن تقدمو وتنجح فيه هو هذك لي عندك احتكاك به وكتفهمو مزيان. الشرارة جات نهار قررنا نجمعو بروفيلات محتاجينها في المشاريع لي كنخدمو للكليان ديالنا، كيوقع لينا تأخر كبير في البحث والتوظيف، ومن جهة أخرى كنعرفو بلي المبرمج عامة كياخذ وقت طويل في البحث على فرصة عمل، وكيضطر يدير واحد البروسيس روتينية مع أكثر من جهة، بالإضافة أنه كاين بروفيلات قوية ما كتعرفش تسوق راسها.
هذي 4 أشهر درنا اجتماع طرحنا فيه سؤال واحد: واش محتاجين شي حل حقيقي لهذا المشكل؟ كنتذكر أن الاجتماع خذى 45 دقيقة تقريبا، وانتهى بنتيجة أننا نستثمرو إمكانياتنا في بلاتفورم يخلي المبرمج يدخل البيانات ديالو، ونهار نحتاجوه نتصلو به. كانت الغاية في الأول من البلاتفورم هو للاستخدام الداخلي ديال الفريق، لكن نضجت أفكارنا وقررنا نخليوه مشروع مستقل ومطروح باش تستافد منو الشركات لي محتاجة مبرمجين، ومن جهة أخرى احنا نجيبو للمبرمج الشركة لي تناسبو.
"موقع Moredev.co هو منصة كتعطي للمبرمج Form بسيطة يعمر فيها البيانات ديالو، وكياخذ الموقع مهمة تقديم بروفايل هذا المبرمج للشركة المناسبة لي محتاجَه من خلال فلترة بيانات البروفيلات (خدامين على تطوير نظام تحليل وإحصاء خاص بنا). المبرمج ما كيخلص والو وما كاين حتى رسوم مخفية. الموقع غادي يوفر للشركات لي كتبحث على مبرمج إمكانية الوصول السريع للبروفايل لي محتاجين."
كانت أصعب مهمة في هذا المشروع هو دراسة السوق المغربية، وفهم آلية التشغيل الموجودة، وجمع أكبر عدد ديال البيانات لي تخلينا نتخذو القرارات الصحيحة. لحسن الحظ أن الخدمة لي كنقدمو هي جزء منا: مجموعة مبرمجين كيقدمو حل لمشكل كيعانيو منو المبرمجين، أيضا احنا بيزنس كنصاوبو حل لبيزنسز آخرين عندهم نفس المشكل لي كان عندنا. تواصلنا مع جهات مختلفة وحصدنا آراء لي خلاتنا نبنيو نموذج عملي.
الموقع اليوم في النسخة Beta، وباقي ما نشرناش ميزات زوينة غادي تكون في الموقع. بحكم ضعف الموارد لي أهمها الوقت احنا راضيين على النتيجة لي وصلنا لها، واحنا اليوم في حاجة للدعم ديالكم.
تقدر تساعدنا بدخول الموقع وتعطينا رأيك في تجربة الاستخدام واقتراحاتك للإضافة، وإلى كنت مبرمج وعندك بروفايل زوين – يشرفنا تكون من الأوئل لي غادي يستخدمو الموقع ديالنا.
كل الحب من فريق موقع Moredev.co من وائل ويوسف وعمران.
الموقع: https://moredev.co
دعاءكم بالتوفيق 🙏
