17/10/2016
منقوول
كان معايا مبلغ بسيط نويت اروح اتبرع بيه فى ابو الريش
غلست اوى على جوزى عشان يودينى وسبحان الله الطريق اتيسر غير العاده من اكتوبر لهناك اخدت بنتى وروحت واقفه مستنياه يركن
بتاع الامن بقوله عاوزه اتبرع جرى جابلى كرسى وكان ناقص يشيلنى انا وبنتى قعدت على جنب بالكرسى لحد ما جوزى يجى
جنب سور المستشفى اى وقت بالليل حد يعدى هتلاقوا ناس نايمه فالشارع دول اهل الاطفال اللى جوه مش معاهم امكانيات يأجروا مكان يباتوا فيه فبيناموا فالشارع
وكمان ساعات يندهوا على اهل الطفل محتاجين لبن محتاجين دوا يعنى منتهى الذل
دخلونا للمدير الادارى الراجل رحب بينا وجاب لنا مدير الخدمه الاجتماعيه طلعنا مكتبه جاب فايل فيه حالات محتاجه
اطفال محتاجه علب لبن ومفيش امكانيه يعنى ممكن يموتوا عشان مفيش لبن
طفله عندها ٨٠ يوم عاوزه انبوبه اكسجين ومفيش امكانيه اهلها بيلفوا يدورا على حد يسلفهم
طفل محتاج دوا بالف جنيه وحالته خطيره مش مع المستشفى غير ٢٠٠جنيه وكمان تبرعات
وحالات كتيييييير مش قادره اوصفها بس دول اللى فكراهم
المستشفى فيها اورام وقلب مفتوح وفشل كلوى
الدعم كله ل٥٧٣٥٧ وتحيا مصر ومجدى يعقوب
يافندم ليه مش عامليين دعايا قال احنا مش معانا نصرف على الدعايا زيهم
التبرع انك تساهم فى علاج حاله
او تتكلف بروشته وهما يبلغوك محتاجين كام
او تعيين اسر فقيره مش لاقيه تاكل وليها حالات عندهم
فى اسر جايه من ادغال مصر وفى اسره مش معاها موبايل متخيليين انهم قاعدين فالشارع عشان لو حصل حاجه محدش هيعرف يوصلهم
اى جنيه بتدفعوا بيبعتوا عالواتس صوره بالفاتوره
الراجل قال احنا هنا بفضل ربنا ثم تبرعاتكم هى اللى سندانا
انا مكنتش ناويه خااااالص اقول لحد بس بعد اللى شفته بعينى واد ايه الناس دى محتاجه ومحدش يعرف عنهم حاجه
دول اطفال بتموت واطفال فى حضانات واطفال عندها اورام واللى عندها ايام وصمامتها مسدوده وعندها اكتر من ثقب وامهات شفتها شايله عياله صغيرييييين وفى ايديهم الكانوله كنت عاوزه اعيط جنبهم حمدت ربنا على كل نعمه مش حاسين بيها وان الحمدلله بنتى سليمه ربنا يجيرهم فى مصائبهم
لو كل واحده فينا اقل الايمان خدت خمسين جنيه وراحت ودتها اقسم بالله ممكن تنقذ طفل احنا بنشترى ميكب اب ولبس وجزم وبناكل باكتر من كده اكننا مش هناكل من بره يوم
ممكن كل كام واحده وصحابها يلموا من بعض ويتصدقوا كل شهر هناك وخلوا كل مره نيه حلوه للصدقه الجميله دى مره تنجحى مره تتجوزى مره يطول فى عمر اهلك مره لمتوفى والله والله ربنا اكرم مننا احنا اللى محتاجين ده مش هما
طولت عليكم وياريت تعملوا كوبي اوشير عشان الكل يشوفوا.. محدش عارف الخير مقسوم من مين لمين "لعل وعسى "
