09/09/2019
اضغط علي نفسك و اشتغل حتي و انت زهقان، حتي و انت تعبان، امسك الكتاب و ذاكر و انت قرفان، افتح النت و خد كورسات حتي و انت فاصل و ملكش نفس .. هيجرالك ايه يعني؟ ولا حاجة! اطلع من الـ Comfort Zone (منطقة الراحة) لأن مفهاش أي انجازات .. و اعمل اللي ينجحك، مش اللي يريحك، إعمل الصحيح .. مش المُريح!
في البداية تركيزك هيبقي ضعيف جدا، بعدين هيزيد شوية في المرة اللي بعدها، و هكذا.
زي بالظبط لما بنقول لواحد إنه يحافظ علي الصلاة، فبيشتكي إنه بيصلي و دماغه في ماتش الكورة، أو في جيم البابجي اللي بيلعبه، أو في اشتراك الجيم اللي هيروح عليه .. مع الوقت تركيزه هيزيد ..و هيخشع في الصلاة.
دايما بقول Don't wait for the perfect moment .. ماتنتظرش إنك عشان تفتح مادة دراسية أو كورس أو كتاب إنك لازم تبقي في أعلي درجات تركيزك و قدامك اللابتوب متلمع و الانترنت سريع و فنجان القهوة بالمكسرات و الجو هادى .. لأ، سيبك من الخيالات دي .. أقعد في أى ظرف، حتي لو تركيزك ضعيف، علي الأقل حتي لو ماستوعبتش كويس، هتكون أخدت خطوة إنك تغلبت علي نفسك، و ربنا هيتكفل بالباقي.
استخدم الموجود .. زي ما عمنا (آندى ستانلي) بيقول:
"Start where you are, use what you have, do what you can."
كلنا عندنا ظروف، و أكتر إنسان إنت شايفه ناجح و لابس شيك و راكب سيارة أحلامه عنده ظروف و ابتلاءات انت ماتستحملهاش، و هو كذلك مايستحملش ظروفك و ابتلاءاتك، ربنا مش بيحمّل حد فوق طاقته، و مش بيبتلي العبد عشوائيا، لأ ده بيبتليك بحاجة معينة لمدة معينة لحكمة معينة.
مع احترامي لمشاكلك، بس بلاش تعيش في دور الضحية و تشتكي ليل نهار .. ماحدش فايق يسمع شكاوي حد، كل واحد عنده همومه و مشاغله، و اللي هيجاملك مرة و يطبطب عليه مش هيبقي فايقلك التانية، و لو فضلت تعيط و تزن و تشتكيله هيشوف رقمك و مش هيرد .. ماتعيش مستهلك و عاجز و عايز غيرك يساعدك .. كلنا عارفين إن الحياة unfair ..شيل نفسك و كمل لأن ماحدش فايق يشيلك .. أقوللك حاجة وماتزعلش؟ ماحدش مهتم بآلامك و مشاكلك .. علم نفسك بنفسك. كلنا عارفين إن المجتمع ظالم و التعليم ضايع و الكوسة و الفساد مبهدلين الدنيا .. ده الواقع .. تعايش معاه و شوفلك سكة.
كل اللي انت محتاجه حاليا خط انترنت وجهاز كمبيوتر .. و تبقي سلطان زمانك، تعرف من مكانك ده توصل لأحدث ما وصل إليه العلم في أي مجال، تقدر دلوقتي تقفل الأمبير في أي تخصص، و انت عارف كده و أنا عارف كدة كويس.
بتحب حياتك؟ سواء هتجاوب بآه أو لأ ..فكر فى دي .. لو شديناك و رميناك قدام عربية مسرعة هتوافق؟؟ طبعا لأ، لأن كلنا خايفين علي حياتنا .. طب ماهي حياتك هي وقتك، و وقتك عبارة سنين و شهور و أسابيع و أيام و ساعات .. بترميهم في الزبالة ليه ؟؟
قرفان و مكتئب؟ عندك وساوس أو هلاوس أو فوبيا؟ الطب النفسي موجود .. ماتسيبس نفسك سرحان في اللا شيء بالساعات .. اتعالج و عيش حياتك عادي، الطب النفسي طب، مش عطارة ولا تنجيم ولا تنمية بشرية لا وصفات شعبية، الدكتور النفسي زي الدكتور الباطني، و ساعات كتير بيبقي دوره أهم، لأن أمراض القولون و المعدة أحد أهم أسبابها عدم القدرة علي التعامل مع الضغوط النفسية.
شجع نفسك كل يوم و اتقدم خطوة كل يوم .. و إلجأ لربنا، و اطلب منه و اتحايل عليه و عيط و زِن و لِح زي الأطفال ، مش هيسيبك و مش هتهون عليه، و مش هيضيعك مهما كنت، بس اتعلم، و امشي صح، و امشي، و كمّل.
#نصيحة اخيرة صلي علي النبي صلى الله عليه وسلم كتيرر.
-منقول
